Դավիթ Իշխանյանը քվեարկել է հանուն միասնության և խաղաղ ապագայի
Արցախ
ՀՅ Դաշնակցության կողմից ԱՀ նախագահի թեկնածու առաջադրված Դավիթ Իշխանյանը քվեարկել է հանուն միասնության և խաղաղ ապագայի, որը ինչ-որ տեղ պայմանավորված է Արցախի քաղաքական կյանքում ՀՅ Դաշնակցության լիարժեք մասնակցությամբ: Այս մասին նախագահի թեկնածուն նշել է լրագրողների հետ ճեպարույցի ժամանակ՝ քաղաքացիական պարտքը կատարելուց հետո:
Անդրադառնալով ընտրություններին ՀՀ իշխանությունների միջամտության մասին հարցին, Դավիթ Իշխանյանը նշել է, որ իշխանություն և պետություն հասկացությունները պետք է տարանջատված լինեն: «Եթե իշխանավորը գործում է պետական մտածելակերպով, պետության ապագայի համար, այս պարագայում երկրորդական է ՀՀ իշխանությունների դիրքորոշումը: Հայաստանի Հանրապետությունը պետք է Արցախի Հանրապետության պաշտպանը լինի՝ որպես անվտանգության և անկախության երաշխավոր»,- ասել է Դավիթ Իշխանյանը:
Խոսելով ընտրությունների ընթացքի մասին, ԱՀ նախագահի թեկնածուն նշել է, որ տարբեր վայրերից տեղեկություններ են ստացել որոշ ընտրախախտումների, կուտակումների վերաբերյալ, որի մասին ահազանգել են ԿԸՀ և ոստիկանություն: Դավիթ Իշխանյանն ուրախալի է համարել ընտրողների ակտիվությունը և հույս հայտնել, որ ժողովուրդը իր արժանին կմատուցի ընտրություններով:
