ՀՄԸՄ-ն 1991-ից վերագտել է իր համահայկական առաքելությունը և այսօր Հայրենիք-Սփյուռք կամրջող մեծ օղակ է. Հակոբ Տեր-Խաչատուրյան
Քաղաքական
ՀՄԸՄ-ն իրավացիորեն հայ ժողովրդի նվիրյալ, երիտասարդ և ամենամեծ կամավոր բանակն է, որ նահատակ ցեղի անմահ մնացորդներից կերտեց նպատակասլաց, պինդ ու հայրենանվեր տորմիղ՝ ամենուրէք ծառայելու համար հայ ազգին, և ոչ միայն մարզական ու սկաուտական ոլորտներում. համա-ՀՄԸՄ-ական 11-րդ խաղերի բացման հանդիսության ժամանակ ելույթում ասաց ՀՅԴ Բյուրոյի ներկայացուցիչ Հակոբ Տեր-Խաչատուրյանը:
«Հայ արիների այս բանակը ոչ միայն ինքնակատարելագործման, մարմնով, մտքով բարձրանալու առաքելության է նվիրված, այլև հատուկ ջանքի է լծված` մեր երիտասարդությանը մղելու նոր նշաձողեր հաղթահարելու՝ մարդկային ազնվության, գաղափարապաշտության եւ հայկական մաքուր դիմագծի կերտման մարզերում: Այս հնոցում կոփվող երիտասարդը պատրաստվում է դիմագրավել համամարդկային ու համահայկական մարտահրավերները միաժամանակ»,- նշեց նա:
Հակոբ Տեր-Խաչատուրյանը հիշեցրեց, որ, ինչպես միշտ, ՀՄԸՄ ԿՎ-ն համահայկական ու հայրենի ամեն նախաձեռնություն սկսում է «Եռաբլուր» պանթեոն այցելությամբ՝ հարգանքի տուրք մատուցելով մեր նահատակներին:
«Մեծ ժառանգության տեր ՀՄԸՄ-ն այսօր էլ մեր հպարտության աղբյուրն է եւ ազգային անխորտակելի կամքի մարմնավորումը: Վստահ ենք, որ այն շարունակաբար պիտի համախմբի սերունդներ, գոտեպնդի ազգային գաղափարախոսությամբ, մղի հայապահպանման, հայակերտման և Հայ դատի պայքարի մարդկային ու հայկական ամենաազնիվ, պարկեշտ, նվիրյալ ու նպատակասլաց իդեալներով»,- նշեց ՀՅԴ Բյուրոյի ներկայացուցիչը` հաջողություն մաղթելով մրցախաղերին:
